LAOAG CITY – Inrakurak ti Malacañang a saanen a makipaset dagiti sumagmamano nga Overseas Filipino Workers (OFWs) iti Zero Remittance Week.
Daytoy a tignay ket inrubuat dagiti sumagmamano nga Overseas Filipino Workers idiay Europe idi Marso 28 agingga inton Abril 4, kagiddan ti pannakaaretar ken ni dati a Presidente Rodrigo Duterte.
Inbatad ni Palace Press Officer Claire Castro, saan nga umanamong dagiti sumagmamano nga Overseas Filipino Workers iti nasao a panawagan gapu ta mabisin ti pamiliada nga adda iti Pilipinas.
Nupay kasta, kunana a saan a piliten ti gobierno dagiti Overseas Filipino Workers a makipaset iti nasao kampania.
Nupay kasta, mangnamnama ti Palasyo nga awan ti labsingenda a linteg ken agbalin a nainkalintegan dagiti Overseas Filipino Workers gapu ta saan met a kariri ti gobierno.
Inlawlawagna a nakadanonen ken ni Presidente Ferdinand Marcos Jr. mainaig iti daytoy a banag ken awan ti aramiden a legal a tignay ti Palasyo.
Ti panawagan laeng ti Palasyo kadagiti Overseas Filipino Workers ket agbalin a naridam, liklikan a mamati iti fake news ken ammoen ti kinapudnona nangruna ken saan a kalaban dagitoy ti gobierno.
