LAOAG CITY – Maalarma dagiti sumagmamano nga opisial ti barangay ditoy siudad ti Laoag gapu iti maipagarup nga anomalya iti barangayda.
Segun ken ni Vice Mayor Rey Carlos Fariñas, apaman a nalpas ti naisayangkat a regular session-da iti napalabas a lawas ket in-share-na iti social media ti maysa nga investigative report ti Bombo Radyo Laoag mainaig kadagiti maipagarup a mapaspasamak nga anomalya ditoy probinsia ket adda dagiti sumagmamano nga opisial ti barangay ditoy siudad ti nagkamang iti opisinana.
Inbatadna nga immuna a nagkamang iti opisinana ti Kapitan ti Barangay San Mateo no sadinno a nailawlawag kenkuana nga awanen ti pakairamramananda iti Commission on Audit.
Inlawlawagna a kalpasan laeng ti sumagmamano a minuto ket nagkamang met iti opisinana dagiti dua a Barangay Kagawad iti Barangay Cataban gapu ta maalarmada iti saan pay a panangisubli ti Barangay Treasurer ti kuarta nga innalana iti pundo ti barangay.
Gapu iti daytoy, nagsurat ni Vice Mayor Fariñas ken ni Mayor James Bryan Alcid a mangipakpakaammo kadagiti arungaing dagiti maseknan nga opisial ti barangay ditoy siudad ti Laoag.
