LAOAG CITY – Maiyur-uray no ania dagiti proyekto ken programa nga ilungalong ti Provincial Agriculture Office, Provincial Veterinary Office ken ti Provincial Engineering Office a pakausaran ti kaudian a naipaay a bingay ti probinsia manipud iti RA 7171 wenno iti “excise tax” ti tabako.
Inlawlawag ni Provincial Planning and Development Officer Engr. Pedro “Pete” Agcaoili Jr. a ti opisinada ken ti Office of Barangay Affairs wenno OBA ti mangkita no adda pay dagiti kiddaw dagiti mannalon a saan pay a naipaay tapno mainayon kadagiti mapundoan.
Kunana a dagitoy ti mailista ken maiyurnos iti “local finance committee” para iti iyuswatda a deliberasion.
Inlawlawagna a no ania ti pagpinalan ti iyuswatda a deliberasion ket isu ti maisubmitir ken ni Gov. Cecilia Araneta Marcos tapno matingiting no maiyallubog met laeng dagitoy kadagiti programana ken kadagiti inkarkarina kadagiti kakailian.
Inbatadna a kalpasan daytoy ket maisubli kadakuada tapno maidasar iti Provincial Development Council.
Innayonna nga apaman a maaprobaran iti Provincial Development Council ket ipadanon daytoy ti gobernador iti Sangguniang Panlalawigan a maudi a mangtingiting kadagiti nailungalong a pakausaran ti RA 7171.
Maipalagip a pinasingkedan ni Officer In Charge Provincial Treasurer Mrs. Noralyn Boque iti kallabes a mancom meeting nga adda ti naawat manen ti Provincial Government of Ilocos Norte a bingay ti gobierno probinsial iti RA 7171.
