LAOAG CITY – Naiget a naglikudan ti kapamilya ni Barangay Chairman Rosphill Ramones iti Barangay 12 iti ili ti Bacarra a dagiti benipisyaryo ti TUPAD ket dagiti met laeng opisyales ti barangay.
Ummuna iti daytoy, adda ti dimmanon nga impormasyon ditoy Bombo Radyo Laoag a dagiti maipagarop nailista a benipisyaryo ket dagiti opisyal ken kapamilya da, barangay tanod ken BHW.
Karaman iti maipagarop a listaan ket isuda Michael Viscayno Acosta a kabsat ti kagawad; Rosie Acoba Addu; Rosita Acoba Addu a maysa a BHW; Arlene Acoba Dacuycuy nga asawa ti kagawad; Jenelyn Danao; Eliza Ayles Galiza; Florencia Lucena Lorenzo; Ronel Ramelb Mangligot nga anak ti Barangay Secretary; Rosita Ratuita Ramones nga ina ti kapitan.
Nagturong met ti News team ti Bombo Radyo Laoag iti pagtaengan ti kapitan ngem saan da a nadanon ken inbatad dagiti kapamilya na a saan da nga ammo no sadinno ti ayan daytoy.
Sinaruno a tinurong ti Bombo Radyo Laoag news team ti Barangay Hall ngem awan pulos ti tao iti nasao a lugar.
Kabayatanna, ikarkarigatan ti Bombo Radyo Laoag a kontaken ken alaan ti komento ti nasao a kapitan.
