LAOAG CITY – Kinumpirmaran ni Mayor Remigio Medrano nga adda dagiti opisyales ti barangay a saan a mangayat a dumalan iti swab test.
Segun kenni Medrano, ita kuma nga aldaw ti idadalan iti swab testing dagiti residente a nakapulapol dagiti nagpositibo iti covid-19 agraman dagiti opisyales.
Nupay kasta, kunana a saan a napan iti testing center dagiti sumagmamano nga opisyales ti barangay.
Inbatad na a saan na a maawatan no apay a saan a kayat dagiti opisyales ti barangay ti dumalan iti swab test gapo ta dagitoy kuma ti agserbi a pagwadan tapno agboluntaryo met dagiti residente a dumalan iti testing.
Gapo iti daytoy, nagballaag ti Mayor a mapilaan ti kaso dagiti agkedked a dumalan iti testing.
Nagkedked met ti mayor a mangibutaktak no anya a barangay ti dakdakamaten na barangay ngem mangnamnama nga intono bigat ket agbaliw ti panunot dagiti maseknan ket umannugot da a dumalan da met laeng ti swab testing.
Innayon na a no saan manen a kayat dagiti maseknan ti dumalan iti swab test ket mapilitan a mangibutaktak ti pakabigbigan dagitoy.
