LAOAG CITY – Inlawlawag ni Mrs. Mary Ang, ti presidente iti Philippine Chinese Chamber of Commerce and Industry ditoy probinsya dagiti pammati ken ar-aramiden da iti pannakaselebrar ti Chinese New Year.
Segun kenkuana, masapol a sakbay iti New Year eve ket dalusan da a naimbag ti balay da tapno maikkat amin a malas wenno dakes nga elemento a naipalaon ti pagtaengan.
Kuna na pay a no mabalin ket malukatan laengen ti balay apaman a madanun ti kaaldawan ti Chinese new year ngem saan dan a maar-aramid.
Innayon na a saan pay a mabalin nga adda dagiti makitkita wenno agwawarang a sagad wenno walis gapu ta mabalin a daytoy to ti mangiwalin ti napintas a gasat a sumangbay kadakuada.
Malaksid kadagitoy, para kadakuada a Chinese ket saan a mabalin nga adda iti agsindi iti apoy no madanun ti chinese new year isut gapuna nga ado dagiti kadaraan na a mapan laengen mangan iti restaurant.
Mainaig ti daytoy, kuna na a nakaugalian dan ti agibunong ti ampao tunggal chinese new year ken ti rumbeng nga agited ket ti kataengan a kameng ti maysa a pamilya.
Inpakaammo pay ni Ang a ti chinese new year ket isu iti gundaway nga agkikinnablaaw ken agsasango da a mangan a sangapamilya, agpapagayam ken agkakabagyan.
