LAOAG CITY – Addan dagiti sumagmamano nga indibidual a napan nagreport iti Philippine National Police iti ili ti San Nicolas a maipagarop a biktima pay ti natiliw nga scammer iti naiyuswat nga entrapment operation iti nasao nga ili.
Daytoy ti inbatad ni Police Capt. Ashley Cacayorin, ti Deputy Chief of Police iti ili ti San Nicolas.
Mainaig iti daytoy, binigbig ni Cacayorin ti suspek a ni Mr. Villamor Ambrocio, residente iti Barangay 5, San Julian iti siudad ti Batac.
Kuna ni Cacayorin a basar iti palawag kadakuada ni Ambrocio, agtrabtrabaho laeng kas rider no sadinno a naiyawat laeng kenkuana ti trabaho nga isuna ti mapan mangpick-up iti kwarta a downpayment iti boarding house.
Gapu iti daytoy, inpakaammo ni Cacayorin a plano da a pilaan ti suspek ti kaso nga estafa ken ti adda ti pakainaigan na iti panaglabsing ti Republic Act (RA)10175 wenno Cybercrime Law.
Immuna iti daytoy, balligi a tiniliw dagiti otoridad ti scammer babaen iti panangidiaya na ti Room for Rent ken alaen na ti advance payment dagiti biktima na.
Segun kenni Mr. Arvin Adina, agtagikua iti apartment nga inusar ti suspek, ken residente iti Barangay 1 iti ili ti San Nicolas, idi napalabas a lawas ket adda ti nagturong iti apartment na a nangibaga a nangipaayen ti advance payment.
Inlawlawag na a nakigtot iti inbaga dagiti maseknan gapo ta awan met ti naaw-awat na a bayad nangruna iti Gcash nga isu ti nabayadan dagitoy.
Inbatad na a gapo iti daytoy ket napan nagpa-blotter ni Adina iti Philippine National Police iti nasao nga ili ken nagkitkita kadagiti legit a post iti online seknan iti Room for Rent.
Kunana nga adda ti nadlaw na nga arig na ket scam ken ado pay dagiti komento a mangibagbaga a daytoy ket scammer.
Gapo iti daytoy, inbatad na a nakisarita kadagiti nagkomento nga ikkaten da ti comment da iti post ti maseknan tapno saan a makadlaw ti suspek, ken kalpasan daytoy ket isuna met ti nakitransaksyon a mismo iti daytoy.
Inpalgak na nga inbaga na iti suspek wenno nagpammarang nga agupa isuna iti kwarto iti uneg ti innem a bulan ken bayadan na a buo ken dagus met a nagtulag dagitoy nga agkita da iti Robinsons iti nasao nga ili.
Mainaig iti daytoy, iti nagkita ni Adina ken ti suspek iti lugar ket inyawat na ti 15 a ribo a pisos ken isu metten ti iyaasideg dagiti otoridad rason a balligi a natiliw daytoy.
Kabayatanna, naamoan a kadagiti ummunan a biktima ti suspek ket nakaala ti tallo ribo a pisos, 1,500 a pisos, 800 a pisos, 3, 500 a pisos kas advance payment.
