LAOAG CITY – Patyen dagiti sumagmamano a taga Solsona nga agnanaed idiay Hawaii a pulitika ti ramot ti gandat a pannakapapatay ni Sang. Bayan Member Jovencio Pascua iti nasao nga ili itay kallabes.
Segun kenni Bombo International Correspondent Manny Pascua, inbatad dagiti saanen a nagpainagan nga Ilokano nga adda ti mangayat a mangipakni kenni Konsehal Pascua gapo ta adda ti boses na tapno mangabak ti kandidato a suportaran na iti masungad nga eleksyon.
Mamati dagiti maseknan nga awan ti plano ti opisyal a pumangal iti nagngatngato a tukad ti pulitika.
Mainaig iti daytoy, nakigtot dagitoy kalpasan a nadamag da a nagandat a mapapatay.
Kabayatanna, padpadaananen dagiti taga Solsona nga ada idiay Hawaii ti manamnama a panagturong ni Pascua iti nasao nga isla.
