LAOG CITY – Maestablisar ti Sumbong Ilocos Norte Email ditoy probinsya nga iwanwan ti Provincial Communication Office.
Segun kenni Bokal Hanson Chua, karaman ti nasao a proyekto iti pannakaestablisar ti Provincial Monitoring Council.
Kunana nga iti nasao nga email ti pagipatuludan kadagiti reklamo maipanggep kadagiti government infrastructure project.
Innayon na a babaen iti nasao nga email ket insigida a makita dagiti problema ken masulosyunan dagitoy.
Kabayantanna, inlawlawag ni Chua nga iti babaen ti Provincial Monitoring Council ket maamoan ti program works tapno makita dagiti proyekto no rumbeng nga adda ti maestablisar iti maysa a lugar ken tapnu masingir ti usto a buwis iti aggregates.
Maipalagip nga immunan a naipakaammo a nabuwangay ti Provincial Monitoring Council babaen ti maysa nga ordinansa nga inpasa ti Sang Panlalawigan tapno mamonitor dagiti Infrastracture Projects ditoy Ilocos Norte.
Ti nasao a grupo ket buklen ti Chairman ti Committee on Infra, Laws, Good Governance, Vice Governor ken Governor.
Segun kenni Board Member Saul Lazo, babaen ti nasao a grupo ket maala amin a rekord manipod kadagiti nagduduma nga ahensya kas ti Department of Public Works and Highways, National Irrigation Administration, Department of Transportation ken dadduma pay nga ahensya a mangiyim-implementar kadagiti nasao a proyekto.
Innayon na a maadal amin dagiti proyekto ken maala ti detalye dagitoy tapno mapakaammoan ti publiko.
