LAOAG CITY – Irubuat ita a tawen ti Ilocos Norte Provincial Library ti “Summer Reading Program.”
Inpakaammo ni Mr. Eric Coloma, provincial librarian a mangrugi ti nasao a programa iti masungad nga aldaw ti lunes Abril kinse ken agpatingga intono Mayo 16.
Inbatadna a dagiti puntiria nga agbalin a klienteda iti daytoy a programa ket dagiti nagannak kaduada dagiti annakda manipud iti Day Care agingga kadagiti agtawen ti sangapulo ket innem wenno dagiti adda iti “junior high school”.
Nupay kasta, inlawlawagna a silulukat daytoy para kadagiti asino man nga interesado a mapan agbasa ti libro, e-books, audio books, magazine, pagwarnakan wenno nobela.
Kunana a kangrunaan a gagem daytoy ti panang-develop a maipagagangay ti panagbasa a pagliwliwaan dagiti pamilia nangnangruna kadagiti ubbing.
Malaksid iti daytoy, puntiria pay ti nasao a programa a maibaliw ti imatang dagiti ubbing kadagiti gadgets. Mainaig iti daytoy, inbunannagna nga adda ti maipaay a gunguna kadagiti nagannak ken dagiti ubbing a mangipaay ti panawenda nga agturong iti provincial library nga agbasa uray tallopulo a minutos laeng iti kada aldaw ti sabado.
Innayonna a nupay naliwliwa dagitoy bayat ti panagbasada ket adda pay ti maited kadagitoy a “token of appreciation” nga agserbi a pakalaglagipanda iti panangsuportada iti nasao a programa ti probinsia malaksid kadagiti “reading materials” a maited kadakuada iti tunggal mapan dagitoy agbasa iti provincial library.
