LAOAG CITY – Inbatad ni Doctor Shirley Agrupis, Presidente iti Mariano Marcos State University (MMSU) iti ciudad ti Batac nga 4 agingga ti 5 ribo laeng nga estudyante ti kabaelan da nga awaten a freshman students.
Inlawlawag na a ti kangrunaan nga ikonsiderar da no apay a limitaran da ti agawat ti estudyante ket gapu iti numero ti academic building ti unibersidad, laboratory rooms a pagyanan dagiti agad-adal ken ti kapasidad ti numero ti faculty a mangisuro.
Inpakaammo pay ni Agrupis a gapu iti covid-19 pandemic ket nagaramid da ti wagas tapno saanen a mapan dagiti estudyante iti mismo a pagadalan no di ket mismo nga isuda ti mapan agpa-eksamen babaen ti pannaki-koordinar da kadagiti local chief executives kadagiti pagturungan da nga ili.
Kuna na nga iti datos da ket addan ti nasurok a 10 a ribo nga aplikante da ngem nasurok nga innem a ribo pay laeng ti nangkumpirmar nga ageksamen para iti entrance test dagiti freshman students.
Immapela ni Agrupis kadagiti saan a maala a sumrek iti nasao nga unibersidad a saan da koma a maup-upay.
