LAOAG CITY – Dimmanonen iti 1,163 nga indibidual ti inarestar ti Philippine National Police (PNP) kadagiti nagduduma nga operasion iti intero a pagilian manipud idi Oktubre 31 agingga iti Nobiembre 2, kagiddan ti pananglagip ti All Saints’ Day ken All Souls’ Day.
Iti pakabuklan, 1,391 nga operasion, 517 kadagiti naarestar ket addaan kadagiti outstanding warrant of arrest para kadagiti nagduduma a krimen.
Basar iti Philippine National Police, karaman kadagiti naiwayat nga operasion ket kontra iti iligal a droga (307 kaso), iligal a sugal (223 kaso) ken dagiti loose firearms (199 kaso).
Dimmanon iti 151,066.11 a gramo ti maipawil a droga ti nakumpiskar.
Nairekord iti pakabuklan a 92,894 a kameng manipud kadagiti nagduduma nga ahensia ti nai-deploy para iti seguridad ita nga Undas pakairamanan ditoy ti 32,317 manipud iti Philippine National Police, 18,838 ket manipud iti Armed Forces of the Philippines, Bureau of Fire Protection ken Philippine Coast Guard ken 41,739 a force multipliers kas kadagiti barangay tanod ken volunteers.
Mainaig iti daytoy, nakumpiskar pay dagiti otoridad ti 478 a patadem, 65 a bote ti arak, 52 a baraha ken dadduma pay a maipawil a ramit iti kamposanto ken pampubliko a lugar.
