LAOAG CITY – Dumanon iti sumurok 100 a campaign posters ti inikkat ti Commission on Elections iti ili ti Sarrat.
Daytoy ti inpakaammo ni Mr. Robert Fernandez, Commission on Elections Officer iti nasao nga ili.
Inbatadna a daytoy ket iti babaen ti Nationwide Operation Baklas idi Pebrero 11.
Kunana a dagiti inikkatda a campaign posters ket manipud iti national highway iti ili ti Sarrat pakairamanan kadagiti lugar a naiget a maipawil kas kadagiti pagadalan, kayo, poste ti kuriente ken dadduma pay.
Inlawlawagna a dagiti campaign posters nga inikkatda ket manipud kadagiti national candidates.
Mainaig iti daytoy, inpetteng ni Mr. Fernandez nga adda ti dua a sistema a sursurotenda no sadinno ti umuna ket ti maaw-awagan a summary a ditoy a kitaenda no umiso met laeng ti nakaikabilan dagiti campaign posters ken no saan ket insigidada nga ikkaten dagitoy idinto ti maikadua ket ti punitive wenno pammagbaga kadagiti maseknan a kandidato ngem no saanda pay laeng nga agtungpal ket mapatawan dagitoy ti maiyannatop a pannusa.
Innayonna a manamnama nga adda pay ti sumaruno a maiwayat nga Operation Baklas kadagiti sumarsaruno nga aldaw.
