LAOAG CITY – Dumanon iti sumurok 15 a ribu nga illegal campaign poster materials ti naikkat babaen ti Commission on Elections ditoy probinsia.
Segun ken ni Atty. Joel Gines, Provincial Election Supervisor, innem a ribu dagiti naikkatda kadagiti saan a mabalin a panangikabilan kadagiti campaign poster materials a kukua ti national candidates idinto a sumurok siam a ribu kadagiti local candidates.
Inbatadna a naipan amin dagitoy iti disposal facility ken saanen a mabalin pay nga alaen dagiti maseknan a kandidato.
Kabayatanna, nagballaag ti Provincial Election Supervisor kadagiti kandidato gapu ta adu manen dagiti naikabil kadagiti napanda nagikkatan kalpasan ti operation baklas.
Innayonna a linawas laeng iti panangisayangkatda ti nasao nga aktibidad gapu ta adda dagiti dadduma pay a pakakumikumanda para iti eleksion.
