LAOAG CITY – Dumanon iti 130 a foreign delegations pakairamanan ti 50 nga heads of state ken 10 nga agdama a monarchs ti agatendar iti pannakaitabon ni Pope Francis.
Basar iti Vatican, ti nasao a listaan ket mabalin a manayonan pay agingga inton aldaw ti Sabado.
Inrakurak ti Vatican nga inyalud-odda ti oras ti public viewing iti bangkay ti pimmusay a Santo Papa.
Daytoy ket kalpasan a planoda koma a lippasen ita a rabii ti Biernes ti panagpila ngem gapu iti kinaadu dagiti tattao nga agkalkalikagum a makita ti Santo Papa iti maudi a gundaway ket isu nga inyalud-odda.
Maipalagip a nagbalin nga atiddog ti pila dagiti tattao nga aggapu pay kadagiti nagduduma a pagilian tapno makita laeng ti Santo Papa.
Iti uneg pay laeng ti agarup maysa a lawas ket nakairekorden ti Rome ti nangato a bilang dagiti ganggannaet ken turista a bumisbisita tapno makita ti bangkay ti Santo Papa.
Basar kadagiti opisial ti Rome a mabalin a maartapan ti bilang dagiti nakipagladingit idi natay ni Pope John Paul II idi 2005.
