LAOAG CITY – Inpakaammo ni Mr. Adreanne Pagsolingan, Information Officer ti Office of the Civil Defense – Region 1 nga adda ti 2,067 a pamilia ti nagbakwit kadagiti evacuation center iti nagduduma a lugar ditoy rehion uno a bukbuklen ti 6,851 nga indibidual gapu kadagiti nagsasaruno a dimmuprak a bagyo.
Segun kenkuana, dumanon iti 4,052 a pamilia wenno bukbuklen ti 14,552 nga indibidual ti naapektaran agingga iti Bagyo Nika idinto nga adda met ti 2,067 a pamilia wenno 6,851 nga indibidual ti naapektaran gapu iti Bagyo Ofel.
Inbatadna a kadagupan kadagiti uppat a probinsia ti rehion uno ket kaadduan dagiti nangisayangkat ti preemptive evacuation ket manipud iti probinsia ti Ilocos Sur.
Kunana nga adda ti 11,597 a pamilia manipud ditoy Ilocos Norte ti naapektaran gapu iti Bagyo Marce idinto a 12,234 a populasion iti intero a rehion uno.
Inlawlawagna nga adda ti 2,294 a nadadael a pagtaengan ken dumanon iti 16.2 a milyon a pisos ti balor ti nadadael iti benneg ti agrikultura gapu iti Bagyo Marce.
Innayonna nga adda ti walo a pagtaengan a partially damage gapu met iti epekto ti Bagyo Nika, Ofel ken Pepito.
