LAOAG CITY – Dumanon iti 33 ti bilang dagiti kaso ti dengue a nairekord ti City Health Office ditoy siudad manipud idi Enero agingga ita nga aldaw iti bulan ti Abril.
Segun ken ni Dr. Rodrigo Catcatan, mangidadaulo ti nasao a pangopisinaan, ti datos ket aggapu manipud kadagiti nagduduma a balay-pagaasan ditoy siudad ti Laoag
Inbatadna a no idasig ti nasao a bilang iti kapada a panawen idi 2024 ket nangatngato ti kaso ita a tawen.
Mamati ni Catcatan a daytoy ket resulta ti agbalbaliw a panawen ken dagiti maur-urnong a danum kadagiti nagduduma a lugar ken saan a madaldalusan nga arubayan.
Kabayatanna, inpakaammo ti City Health Officer nga agtultuloy dagiti programa nga ar-aramidenda kas ti panawagan a panagdalus iti tunggal alas kuatro ti malem ken ti barangay strategy a 5S.
