LAOAG CITY – Adda ti sumurok 30 nga indibidual ti nasugatan kalpasan a nagwala dagiti sumagmamano a nakamaskara a raliyista idiay Ayala Bridge, Manila kagiddan iti pananglagip ti maika-53 nga anibersario ti Martial Law.
Malaksid iti daytoy, ginandat pay dagiti raliyista a makadanon iti Mendiola nga asideg iti Malacañang idi nangrugi ti riribuk.
Nangrugi ti tension idi puuran dagiti sumagmamano nga agtutubo a lallaki dagiti ligay iti sango ti shipping container a nagserbi nga abbeng ti pulisia.
Nangipurwak dagitoy ti bote, bato ken pinta rason a nagusar ti riot shield dagiti pulis.
Agarup alas-4 ti malem, naikkat ti abbeng ken nakaballasiw dagiti raliyista iti Legarda Street a nagturong iti Mendiola Bridge.
Nadadael ti sarming ti maysa a payloader nga asideg iti unibersidad ken maysa a motorsiklo ti inuram dagiti raliyista.
Nakairekord ti maysa a napigsa a panagbettak iti saan pay a masinunuo a naggapoanna.
Naammoan a sumagmamano kadagiti pulis ti nakapasar ti nabangsit a substance chemical a saan pay a naduktalan agpapan iti daytoy a gundaway.
Basar iti report ti Bombo Radyo News Team iti lugar, nadakamat a dagiti nangriribuk ket dagiti sumagmamano a menor de edad ken agpukpukkawda pay a kalikagumda nga uramen ti Malakanyang.
Kabayatanna, dua a lallaki ti naarestar ken sumurok iti 10 a nakamangisit a raliyista ti pinapakkleb ken binantayan dagiti pulis.
