LAOAG CITY – Immaboten ti sumurok 450 a pasiente ti leptospirosis iti agdama a naka-admit iti nagduduma nga ospital ti Department of Health (DOH) iti National Capital Region (NCR).
Ti panangngato ti bilang dagiti naospital ket gapu iti agsasaruno a napalawa a panaglayus a napasaran iti Metro Manila iti kallabes.
Basar iti kabaroan a quick count ti Health Emegency Bureau ti Department of Health (DOH), immaboten iti pakabuklan nga 856 ti nairekord a kaso ti leptospirosis iti intero a pagilian manipud Enero 4 agingga Agosto 22 ita a tawen.
Nababbaba daytoy ti 66% komparar iti 2,546 a nairekord a kaso iti kapada a panawen idi 2025, ngem agtululoy ti panag-annad ti ahensia iti posible a panagadu dagiti agsakit gapu iti 15-day incubation period ti bacteria.
Impasigurado ti ahensia a nakasagana dagiti public facilities ken adda pannakaiget a monitoring tapno alisto a maurnos ti panangiyakar dagiti pasiente no kasapulan.
Iti babaen ti nadakamat nga addang, maliklikan ti overcrowding wenno nakaro a panagadu ti pasiente iti maymaysa nga ospital kabayatan a pagtalinaedanda a umdas ti suplay dagiti kasapulan nga agas para iti amin nga naapektaran ti sakit.
