LAOAG CITY – Nakairekord ti Department of Health (DOH) ti pakabuklan a 4,600 a baro a kaso ti human immunodeficiency virus (HIV) iti pagilian iti umuna a tallo a bulan ti 2026.
Basar iti kaudian a datos manipud iti HIV and AIDS Surveillance of the Philippines, umabot iti 4,633 ti baro nga HIV cases ti nairekord manipud Enero agingga Marso ita a tawen a siam a porsiento a nangatngato maidasig iti kapada a panawen iti napalabas a tawen.
Iti pakabuklan a bilang, inbatad ti Department of Health a 1,104 wenno 24 a porsiento kadagiti baro a kaso ket adda iti advanced HIV stage idi isuda ket na-diagnose.
Umabot iti average a 51 a kaso iti kada aldaw ti nairekord ita a quarter a nababbaba daytoy ti 11 a porsiento maidasig iti 57 a daily cases a nairekord iti kapada a panawen idi 2025.
Kabayatanna, ti average monthly cases ket adda iti 1,544 a nababbaba met ti siam a porsiento maidasig iti 1,693 a monthly cases iti napalabas a tawen.
Kangatoan ti bilang dagiti baro a kaso iti National Capital Region (NCR) nga addaan ti 989 infections, sinaruno ti Calabarzon nga addaan ti 808, Central Luzon nga addaan ti 551, Soccsksargen nga addaan ti 277 ken Davao Region nga addaan ti 263 kaso.
