LAOAG CITY – Inpasingked ni Dr. Joann Corpuz, Schools Division Superintendent ti Department of Education – Schools Division Office of Laoag City a nakipaset ti sumurok 500 nga atleta ti DepEd Laoag kadagiti amin nga ay-ayam ti Region 1 Athletic Association Meet idiay Bacnotan La Union ken Dagupan City, Pangasinan.
Segun kenkuana, adda ti uppat a baro nga sporting events a nakipasetan dagiti atleta pakairamanan ti boxing, wrestling, wushu ken pencak silat.
Inbatadna a dumanon iti 832 a delegates manipud iti Team Laoag no sadinno a manipud iti nasao a bilang ket 507 ti atleta, 142 ti coach, 12 ti medical personnel, 47 ti delegation officials, 44 ti food committee, 13 ti supervising officials, 1 ti DepEd trainer, 31 ti technical officials ken 35 ti National Trainers.
Inlawlawagna a nagpaot ti uppat a bulan ti panagsanay dagiti atleta a nangrugi dagitoy idi Nobiembre 2024 agingga ita a Marso 2025.
Kabayatanna, mangnamnama ti Schools Division Superintendent ti Department of Education – Schools Division Office of Laoag City a magun-odda ti back to back Champion ita a tawen.
Maipalagip a ti Team Laoag ti nagballigi iti Region 1 Athletic Association Meet iti napalabas a tawen 2024.
