LAOAG CITY – Dumanon iti 674 a reklamo ti nairekord kontra kadagiti abusado a pulis manipud idi Enero agingga iti Marso ita a tawen.
Segun ken ni Philippine National Police – Internal Affairs Service (PNP-IAS) Inspector General Atty. Brigido Dulay, agpapada nga “isolated cases” laeng dagitoy ket saan a mangipasimudaag iti pakabuklan a 228 a ribu a miembro ti nailian a pulisia.
Basar iti datos ti Internal Affairs Service, adda ti 1,897 a reklamo kontra kadagiti pulis idi 2023 ken ngimmato daytoy ti 2,073 a kaso idi 2024.
Inlawlawag ni Dulay, dagiti reklamo ket mangireprepresentar laeng iti 1% iti pakabuklan ti nailian a pulisia.
Inpettengna a ti nabatbati a 99% ket dagiti natulnog, mapagtalkan ken naannayas nga agserserbi iti pagilian.
Kagiddan daytoy, maminsan manen nga irubuat ti Internal Affairs Service ti Integrity Caravan a maysa nga addang tapno maminsan manen a biagen ti kultura ti integridad ken propesionalismo kadagiti kapulisan.
