LAOAG CITY – Inrakurak ti Department of Health (DOH) ti panagngato ti bilang dagiti Kanlaon evacuees a makapaspasar kadagiti respiratory infection sipod idi inyatnag ti gobierno ti nalawa nga evacuation.
Basar iti Department of Health – Negros Island Region, dumanonen iti 74 nga evacuees ti naaddaan ti nagduduma a respiratory infection sipod idi naiwayat ti forced evacuation.
Adda ti pakabuklan a 71 nga indibidual met ti naaddaan ti dadduma pay a sakit.
Adda ti pakabuklan a 77 a medical personnel a naka-deploy kadagiti 32 nga evacuation center kadagiti lugar a naapektaran.
Naduktalan dagiti medical personnel ti nangato a bilang dagiti nagsakit kageddan metten ti regular a check-up ken health surveillance.
Kangrunaan a binantayan dagitoy dagiti evacuation center iti La Castellana, Bago City, La Carlota City ken San Carlos City idiay Negros Occidental ken Canlaon idiay Negros Oriental.
Inpasigurado met ti Department of Health ti agtultuloy a pannakairuar dagiti agas ken dadduma pay a medical supplies kadagiti evacuation center tapno mausar dagiti masaksakit nga evacuees.
Kabayatanna, naammoan a nakaibunongen ti ahensia ti pakabuklan a 135,329 nga assorted medicines, 87,200 N15 masks ken 48,500 face masks, 17,000 aquatabs, 349 nebulizer kits ken rinibu a surgical gloves and goggles, sipod idi naminsan manen a pimmutok ti bulkan iti umuna a paset ti Disiembre.
