LAOAG CITY – Simmangpeten ti sumurok 800 a delegates manipud iti Central Visayas ditoy Ilocos Norte para iti 2025 Palarong Pambansa.
Segun ken ni Mr. Tomas Pastor, Regional Sports Officer ti Central Visayas, adda ti 860 ti pakabuklan a bilang dagiti delegates manipud iti Central Visayas idinto nga adda ti 649 a pakairamanan dagiti atleta, coaches ken chaperone.
Inbatadna a nabara ti panangsarabo kadakuada ti probinsia ti Ilocos Norte manipud iti Laoag International Airport agingga a naitulodda iti Billeting Quarters.
Inlawlawagna nga apaman a nakasangpetda ditoy probinsia ket awan met pay ti timmaod a problema.
Kunana a mangisayangkatda ti panagsanay kadagiti playing venues, tallo nga aldaw sakbay ti panangrugi ti Palarong Pambansa inton Sabado.
Innayonna nga iti napalabas a Palarong Pambansa ket nagun-odda ti maikalima a puesto no sadinno a kaaduan kadagiti ay-ayam a nagballigida ket ti basketball, volleyball, athletics ken dance sports.
Mainaig iti daytoy, inpakaammo ni Earhl Jann Carascal, maysa nga atleta manipud idiay siudad ti Cebu a magagaran daytoy a makibinnalubal iti tay-ak ti boksing.
Kabayatanna, kuna pay ni Zeus Cabras, maysa nga atleta manipud met laeng idiay siudad ti Cebu a naiget daytoy a dimmalan iti panagsanay ti badminton tapno maipasigurado a makagun-od ti medalya.
