LAOAG CITY – Nangipaay ti nagduduma nga humanitarian assistance iti pakabuklan nga 804,323 a benepisiario iti umuna a kagudua ti 2024 ti Philippine Red Cross (PRC), maibasar iti datos nga inparuk-at ti Operations Center daytoy.
Manipud idi Enero 1 agingga idi Hulio 4, nangipaay ti Philippine Red Cross ti mainum a danum kadagiti 296,613 nga indibidual, nangipaay ti taraon kadagiti 132,875, nangited ti 131,223 nga yunit ti dara, nagserbi kadagiti 89,821 kadagiti health caravan, nagserbi kadagiti 19,942 babaen ti PRC emergency vehicles.
Nakabakuna met ti Philippine Red Cross ti dumanon iti 18,935 a tattao, nangisayangkat ti 1,893 dialysis treatments ken nangipasdek ti kanayunan a 71 shelters ken dadduma pay.
Dinakamat ni Philippine Red Cross Secretary-General Dr. Gwen Pang a ti Philippine Red Cross ket nagtalinaed a nakapokus iti misyon a makissayan ti kinarigat a mapaspasaran dagiti umili.
