LAOAG CITY – Inpasigurado ni Department of Economy, Planning, and Development (DEPDev) Sec. Arsenio Balisacan nga imbestigaranda ti sumurok siam a ribu a flood control project maiyataday iti nagbalin a pammilin ni Pangulong Ferdinand Marcos Jr.
Segun iti sekretario, planoda pay laeng nga umuna a mangiwayat ti inspeksion ken i-review ti dadakkel a proyekto manipud idi 2022 agingga 2025 kabayatan ti interpelasion ni House Committee on Public Accounts Chair Terry Ridon iti budget briefing ti Development Budget Coordination Committee.
Inbatadna a paset ti etratehiada ket duktalen no naipasdek met laeng dagiti flood control project, no daytoy ket agop-operar wenno partially operational, adda ti perdina ken no masolsolbarna iti pannakalapped ti panaglayos.
Inlawlawag ni Balisacan a saan a paset ti review-da iti panangduktal no asino ti guilty ken saan.
Nupay kasta, kunana a ti resulta iti panangtingitingda ket mabalin nga usaren dagiti ahensia kas ti Commission on Audit, Ombudsman wenno Department of Justice iti panangiwayat ti bukud nga imbestigasionda ken mangipila ti reklamo.
