LAOAG CITY – Umaboten iti sumurok-kumurang 16 a milyon a tattao ti apektado iti snow storm idiay Estados Unidos.
Daytoy ti inpakaammu ni Bombo International News Correspondent Rene Ballenas iti Estados Unidos apaman a sumagmamno kadagiti estado ket makapaspasar ita ti nakaro a panagyelo nangruna iti Virginia, Kentucky, Indiana, West Virginia, Maryland, Washington D.C ken Illinois.
Naamuan pay nga adda sumagmamanon nga indibidual a pimmusay gapu iti mapaspasaran da nga snow storm.
Segun kenkuana, no ditoy Pilipinas ket makapaspasar ti landslide gapu iti nakaro a tudo, idiay Estados Unidos ket gapu iti snow.
Iti agdama, agarup 265,000 a residente idiay Estados Unidos ti naawanan ti suplay ti kuryente gapu iti snow storm.
Malaksid iti suplay ti kuryente ket naruay pay dagiti naapekataran a negosyo idiay Washington D.C no sadinno nga umaboten iti 18 a pulgada ti kinabengbeng ti yelo a nairekord.
Agraman ti agarup 2,000 a flights iti Estados Unidos ket nagkanselar ti flights.
Inpakamamu pay ni Ballenas a ti serrek kadagiti pagadalan iti Philadelphia, Baltimore ken Washington D.C. ket nakanselar, idinto a nagdeklara metten ti states of emergency iti West Virginia, Virginia ken Maryland.
Kabayatanna, adda metten ti panagballaag ti National Weather Service (NWS) gapu ta posible nga agbayag pay ti snow storm a mabalin a mapasaran idiay Estados Unidos.
