LAOAG CITY – Naragsak nga inpakaammo ni Col. Marcelo Valdez Jr., Director ti 101st Community Defense Center Philippine Army nga adda ti naidesignar a reservist iti tunggal Local Government Unit ditoy probinsia pakairamanan dagiti 21 nga ili ken dua a siudad.
Segun kenkuna, dagiti nasao a reservist ket awan ti maaw-awatna a sueldo no di ket para laeng iti meal allowance ti maipapaay kadakuada.
Inbatadna nga adda ti maiyus-uswat a reserve force kas maibasar iti Republic Act No. 7077 no sadino ingkapilitan para kadakuada ti sumurot kadagiti pannakaipatungpal kadagiti nagduduma nga aktibidad.
Kunana nga iti agdama ket adda ti 19 nga officers ken sumurok-kumurang a 500 a reservist ti 101st Reserve Battalion.
Innayonna a dakkel a tulong dagiti reservist kadagiti maisaysayangkat nga aktibidad ken programa tapno maitantudo ti kinapateg ti pannakatagiben ti aglawlaw.
