LAOAG CITY – Nabirukan ti maysa a plastic pack ti shabu a tumtumpaw iti paset ti kabaybayan iti Brgy. Bobon iti ili ti Burgos.
Segun ken ni P/Capt. Jenny Lingan, Hepe ti Philippine National Police iti ili ti Burgos, agdagsen iti 997.62 grams ti narekobre a shabu nga agbalor iti sumurok-kumurang 7 a milyon a pisos.
Inbatadna a nasarakan ti maysa a mangngalap a ni Johnny Zamora ti plastic pack ti shabu a tumtumpaw iti kabaybayan iti kaadayo a 12 nautical miles manipud iti kadagaan.
Inlawlawagna a dagus daytoy a nai-turn over iti Provincial Forensic Unit no sadino ditoy a nakumpirmaran a positibo a shabu ti linaon iti nasao a plastic pack.
Mainaig iti daytoy, kinumpirmaran ni P/Capt. Lingan a ti nadakamat a plastic pack ti shabu a nabirukan ditoy Ilocos Norte ken dagiti nasarakan a plastic pack ti shabu idiay Ilocos Sur nga agbalor iti 6.7 milyon a pisos ket agpada nga adda ti Chinese markings-na.
Innayonna a ti nasarakan a plastic pack ket agmaris ti light blue nga addaan ti marka a “Cai Yu Lin” ken red Chinese characters.
Kabayatanna, plano nga ikkan ti Philippine National Police ti gungguna ti maseknan a mangngalap a nakakita ti minilyon a balor ti shabu.
