LAOAG CITY – Manamnama a dumanon iti sumurok-kumurang 8 a ribu nga indibidual ti agatendar iti State of the Province Address (SOPA) ni Gov. Matthew Marcos Manotoc ita nga aldaw, Oktubre 8 iti Ilocos Norte Centennial Arena.
Daytoy ti inpakaammo ni Mr. Gervy James Gumarit, mangidadaulo ti Provincial Communications and Media Office.
Segun kenkuana, dagiti manamnama a makipaset iti naindaklan nga aktibidad ket dagiti Mayor, Bise Mayor, Sangguniang Panlungsod Members, Sangguniang Bayan Members, dagiti Kapitan pakairamanan dagiti mangidadaulo kadagiti nagduduma a national agencies ti pagilian.
Inbatadna a dagiti posible a kangrunaan nga irakurak ni Gov. Manotoc iti panagbitlana ket maipanggep iti panagdur-as ti ekonomia ditoy probinsia, benepisio a maipapaay kadagiti Micro Small and Medium Entrepreneurs, iti benneg ti agrikultura, edukasion, salun-at ken dadduma pay.
Inlawlawagna nga all set aminen dagiti kasapulan iti pannakaiyuswat ti State of the Province Address ni Gov. Manotoc no sadinno a nagturong ti Gobernador iti Ilocos Norte Centennial Arena para iti technical rehearsal.
Naammoan a barong ken filipiñana attire ti aruat dagiti mapan agatendar iti naisangsangayan a programa ita nga aldaw.
Maipalagip a namindua a daras a naitantan ti pannakaisayangkat ti State of the Province Address ti Gobernador gapu iti iduduprak ti Bagyo Julian.
