LAOAG CITY – Inrakurak ti Civil Aviation Authority of the Philippines (CAAP) a nagpuonan ti nailian a gobierno ti sumurok P12 a bilyon para iti modernisasion dagiti sumagmamano nga eropuerto iti intero a pagilian ita a tawen.
Inbatad ni Civil Aviation Authority of the Philippines Director General Manuel Antonio Tamayo a karaman iti investment ti P10.6 a bilyon para iti civil works ken P1.8 a bilyon para iti equipment ken systems upgrades para iti 2025.
Inlawlawagna a karaman kadagiti prioridad a proyekto ket ti night-rating upgrades ti Cauayan, Dipolog ken Pagadian airports nga agbalin a natalged ken napintas nga operasion iti rabii tapno masolbar ti ngumatngato nga air traffic demands.
Kunana a ti Bukidnon Airport ket adda iti track met tapno marugian ti operasion para iti pakabuklan nga aviation iti umuna a kuarter ti 2025.
