LAOAG CITY – Dumanon iti sumurok 300 a ribu a pisos ti balor iti pannakauram ti maysa a pagtaengan iti Barangay 2 iti ili ti Bacarra.
Daytoy ti inpakaammo ti Imbestigador ti Bureau of Fire Protection iti nasao nga ili.
Mainaig iti daytoy, segun iti akinkukua ti balay a ni Mrs. Vina Reginaldo, nangrugi ti apoy iti maikadua a kadsaaran ti pagtaenganda.
Inpakaammona nga adda ti agwel-welding iti balayda gapu ta manarimaan ti panagpa-renovate-da.
Kunana a posible a ti maiyus-uswat a panag-welding iti balayda ti nangrugian ti apoy.
Innayonna nga alisto a nagramram ti apoy gapu ta ti maysa a kuarto iti balayda ket naruay dagiti nakapenpen a lupotna malaksid pay ti kinapigsa ti angin.
Kabayatanna, iti agdama ket agtultuloy pay laeng ti maiwaywayat nga imbestigasion seknan iti napasamak nga uram.
