LAOAG CITY – Nai-defer iti Sangguniang Panlungsod ti maysa a resolusion nga agkidkiddaw ti sumurok 9 milyon a pisos a nayon para iti panaggatang ti heavy equipment iti lokal a gobierno ditoy siudad ti Laoag.
Segun ken ni Sangguniang Panlungsod Member Jason Perrera, agkidkiddaw ti nayon a pundo ti executive branch babaen ti Local Finance Committee para iti naan-anay a pannakagatang kadagiti kasapulan nga heavy equipment no adda ti sumangbay a didigra.
Inbatadna nga adda pay ti immun-una a nailatang a pundo para iti daytoy ngem agkurang isut gapuna a kasapulan ti nayon a pundo tapno makagatang ti nagduduma nga heavy equipment para iti siudad.
Inlawlawagna a nai-defer ti nasao a resolusion gapu ta awan ti nakitana a nakailanad a capacity dagiti magatang nga heavy equipment kas ti dump truck, payloader, bulldozer ken dadduma pay.
Gapu iti daytoy, inpettengna a masapul nga iplastar nga umuna a naimbag ti resolusion tapno maammoan no ania a klase nga heavy equipment ti magatang tapno masigurado a maigatang ti kuarta ti gobierno iti pakaipapananna.
Innayonna nga adda ti agarup 50 agingga 60 milyon a pisos ti immunan a nailatang a pundo ngem gapu ta maipagarup a ngimmina dagiti magatang nga heavy equipment ket kasapulan ti sumurok 9 milyon a pisos a nayon para iti panaggatang kadagitoy.
