LAOAG CITY – Maysa a naisangsangayan a balligi ti nagun-od ni Trixia Anne Arellano aka “Super Tikya” manipud iti Western Visayas kalpasan a nangabak ti balitok a medalya iti 200-meter dash iti Palarong Pambansa 2025 iti mismo nga aldaw ti panagkasangayna.
Ibilangna a nakapinpintas a regalo daytoy iti panagkasangayna kalpasan ti panagballigina.
Saan laeng a balitok ti nagun-od ti naawagan kas “Super Tikya,” no diket naburakna pay ti nabayagen a record a 26.7 seconds a nagun-od ni Maureen Schrijvers ti National Capital Region idi 2008.
Nairekord ni Arellano ti baro a rekord a 26.40 seconds rason nga ad-adda a napabilib dagiti agbuybuya ken dagiti mangipapaay ti suporta kenkuana.
Inbatad ni Arellano, nagbalin a naiget ti training-na sakbay ti Palaro ngem nagresulta met daytoy ti napintas.
Inpeksana ti napalaos a panagyamanna iti Dios gapu ta natungpal ti arapaapna.
Malaksid iti naisangsangayan a rekord, ad-adda a napabilib ti kaaduan ken ni Arellano idi naammonda a nagtaray isuna a sisasaka kalpasan a napigis ti akin-baba a paset ti sapatos daytoy sakbay ti panangrugi ti karera gapu iti pannakatekklebna.
Gapu iti daytoy, ti laeng medical tape ti nagserbi a sapatos daytoy tapno maliklikan a masugatan.
Inlawlawagna a saan daytoy a nagbalin a lapped tapno saan a magun-od ti panagballigi imbes ket inaramidna ti amin a kabaelanna.
Kabayatanna, daytoy ti kaunaan a gundaway a nakipaset ni Arellano iti Palarong Pambansa ken insigida a nangaramid ti marka, saan laeng kas maysa a kampeon no diket maysa nga inspirasion iti adu nga atleta iti intero a pagilian.
