LAOAG CITY – Inpasigurado ti Department of Agriculture (DA) ken ti Food Terminal Inc. (FTI) nga umdas a suplay ti gobierno para iti agtultuloy a Benteng Bigas Meron na (BBM) program.
Inbatad ni Agriculture Secretary Francisco Tiu Laurel Jr., agtultuloy ti maisaysayangkat a replenishment ti National Food Authority (NFA) kadagiti stock-da tapno masigurado nga agtultuloy ti pannakailako dagitoy kadagiti Kadiwa Stores a nakalukat iti intero a pagilian.
Inlawlawagna a maawatan ti ahensiada a posible a mangitunda ti stocking anxiety ti kumarkaro a gubat iti Middle East nangruna kadagiti paset iti vulnerable sector.
Nupay kasta, inpetteng ti sekretario a ti panagtignay gapu iti panagdanag wenno panag-panic ket posible laeng a mangpakaro iti agdama a situasion.
