LAOAG CITY – Inpakaammo ni Dr. Rodrigo Catcatan, mangidadaulo ti City Health Office a naibusen ti suplay ti anti-rabies vaccine ditoy siudad ti Laoag.
Segun kenkuana, daytoy ket kalpasan a naobserbaranda nga adu dagiti nagturong iti opisinada nga agkasapulan para iti anti-rabies vaccine.
Inbatadna nga iti napalabas laeng a dua a lawas ket naibus manen dagiti naudi a ginatangda.
Nu pay kasta, inlawlawagna a nakagatangda metten ken maiyur-uray laengen ti pannakai-deliver-na dagitoy.
Kunana nga apaman a makasangpet dagitoy a bakuna ket libre met amin dagitoy a maipaay kadagiti umili ditoy siudad ti Laoag.
Kabayatanna, maragsakan ni Dr. Catcatan gapu ta makitana iti kinaresponsable dagiti umili gapu ta insigida a mapan dagitoy nga agpabakuna kalpasan a makagat ken makaramutan dagitoy iti tarakenda nga aso ken pusa.
Maipalagip nga immunan nga inpakaammo ti City Health Office nga awan pay ti kaso ti human rabies ita a tawen ken maymaysa pay laeng ti aso a nagpositibo iti rabies ditoy siudad ti Laoag .
Naammoan a daytoy ti mangipakita nga agbalbalinen a pet-friendly ken rabies free ditoy siudad ti Laoag.
