LAOAG CITY – Agtalinaed a nangato ti suplay ti bagas ditoy Pilipinas agingga nga agngudo ti tawen iti baet ti manamnama a production loss gapu iti La Niña ken dadduma pay a problema iti klima.
Basar iti Department of Agriculture, adda ti manamnama a 3.83 million metric tons ti nakapenpen a bagas inton katapusan ti 2024, umdas a suplay para iti sangagasut nga aldaw.
Iti datos ti Philippine Statistics Authority, bimmagsak ti 11.9% ti produksion ti irik idi third quarter gapu iti pannakadadael gubuay kadagiti naglabas a bagyo.
Iti baet daytoy, kampante met ti Department of Agriculture iti suplay ti bagas gapu ta ngimmato ti 24% sipod iti napalabas a tawen ti inangkat a bagas ti pagilian.
Inbatad ni Department of Agriculture Undersecretary Christopher Morales, nakatulong met ti panagkissay iti taripa iti imported rice tapno masolbar ti posible a shortage iti suplay gapu iti kalamidad.
