LAOAG CITY – Inpasigurado ni Ms. Edna Orcino, ti Administrator ti Philippine Red Cross – Ilocos Norte Chapter nga adda ti makaanay a suplay ti dara ti probinsya.
Karaman iti suplay da ti dara ken dagiti nagduduma a blood types ken uray ti platelets concentrate nga isu ti kanayon nga isagsagana da.
Segun kenni Orcino, ti kangrunaan a makidkiddaw kadakuada ket para kadagiti addaan ti nababa nga hemoglobin tapno agbalin a normal ti anemic status wenno sitwasyon ti pasyente.
Inlawlawag na nga iti agdama ket saan da a masigurado a nangato ti demand ti dara no pakaseknan iti dengue gapo ta manmano pay laeng ti nagkiddaw kadakuada.
Daytoy ket no ikumpara iti napalabas a tawen a no sadinno iti uneg ti maysa laeng a lawas ket umabot iti 10 agingga iti 20 ti agkiddaw.
Kunana nga iti rekord ti Red Cross ditoy probinsya, ita a bulan ti Hunyo ket adda ti lima a nagkiddaw kadadakuada ti dara, dua idi Enero ken tallo idi Marso.
Mainaig iti daytoy, inadmitir ni Orcino nga adda ti kaso a saan da a makaipaay ti naan-anay a kasapulan ti pasyente gapo nagduduma a rason kas iti blood type wenno no ado dagiti napan nagkiddaw partikular iti maud-udi nangruna ket saan da met a masakbayan no mano a pasyente ti agkasapulan ken mano a bag ti dara ti masapol daytoy iti inaldaw.
Nupay kasta, inbatad na a kanayon met a siguradwen ti ahensya nga adda ti suplay babaen iti adbokasiya ken panangipromote ti blood donation tapno adda latta ti stock iti nagduduma a blood type.
Naamoan a ti Type O a dara ti masansan a kasapulan dagiti agkidkiddaw.
