LAOAG CITY – Inpatalged ni Provincial Veterinarian Dr. Loida Valenzuela ti food security ditoy Ilocos Norte iti baet nga adda dagiti kaso ti African Swine Fever wenno ASF virus ditoy probinsia.
Sungbat daytoy ni Valenzuela kalpasan a sinaludsud ni Sangguniang Panlalawigan Member Donald Nicolas no umdas met laeng ti suplay ti karne ti baboy ditoy probinsia iti baet ti pangta ti ASF virus nangruna ket simreken ti “ber months.
Segun ken ni Dr. Valenzuela, umanay pay laeng ti suplay ti karne ti baboy ditoy probinsia agingga a madanon ti paskua.
Inlawlawagna nga awan ti agbalin a problema iti suplay ti karne ti baboy ditoy probinsya agingga a saan a maapektaran ti ASF virus dagiti dadakkel a farm a pagal-alaan ti suplay.
Innayonna nga agtultuloy ti panag-export-da nangruna ket agkurkurang ti suplay ti karne idiay Metro Manila kadagitoy a gundaway.
Kabayatanna, inpakaammo ti Provincial Veterinarian nga iti agdama ket adda siyam a lugar ditoy Ilocos Norte nga apektado ti ASF virus, pakairamanan ditoy ti ili ti Solsona, Dingras, Marcos, Nueva Era, Carasi, Vintar, Sarrat, Laoag City ken Banna.
