LAOAG CITY – Adda iti panagbaba ti suplay ti karne ti manok iti Laoag City Commercial Complex ditoy ciudad ti Laoag partikular iti naggapo idiay ili ti Enrile, Cagayan.
Daytoy ti kinumpirmaran ni Mr. Joseph Martin, taga Barangay 7-B ditoy ciudad ti Laoag ken maysa kadagiti aglaklako ti karne ti manok iti nadakamat a merkado publiko.
Segun kenni Martin, umabot laengen iti 100 a pidaso ti manok ti maal-ala na nga aggapo iti poultry idiay Cagayan manipud iti dati a 300 a pidaso.
Nupay kasta, naamoan nga ado latta ti lako ni Martin a karne ti manok gapo ta adda pay ti sabali a supplier na.
Kabayatanna, awan met ti panagkurang ti suplay ti karne ti manok kadagiti dadduma nga aglaklako iti nasao a merkado publiko.
Iti sabali a bangir, kinumpirmaran ni Engr. Jerry Ancheta, mangimatmaton ti dakkel a poultry farm iti ili ti San Nicolas a ngimmato ti demand ti itlog ti manok.
Segun kenni Ancheta, addan ti tallo wenno uppat a bulan a nangato ti demand ken alisto a maibus.
Inlawlawag na a sumagmamano kadagiti makitkita na a rason ket ti shortage kadagiti breeders, ken iti napalpalabas a tawen ket dimmakel ti per capita.
Mainaig iti daytoy, iti biang ti bukod na a poultry farm, adda pay ti manamnama kuma a pasangpeten da a piyek ita a bulan ti Oktubre ngem naitantan.
Gapo iti daytoy, ibilang na a sabsabali ti demand ti itlog ti manok kadagitoy a panawen no ikumpara iti napalpalabas a tawtawen.
Kabayaanna, inpasigurado ni Ancheta a natalged dagiti mairwar nga itlog manipud iti poultry farm na.
