LAOAG CITY – Inpakaammo ni Sang bayan member Ryan Andres iti ili ti Adams a nakarigrigat ti sitwasyon da iti agdama kalpasan ti iduduprak ti bagyo Neneng.
Inlawlawag na a gapu iti dakes a panawen ket ado dagiti nadadael iti nasao nga lugar no sadinno a saan da pulos a makadalyasat iti kalsada gapu ti kaado ti perdisyon na.
Kuna na nga uray ti suplay ti kuryente iti nasao nga ili ket awan pay agpapan ita gapu ta ado dagiti poste ken waya a nadadael.
Inbatad ni Konsehal Andres a possible nga umabot iti makalawas sakbay a naan-anay a matarimaan dagiti nadadael a poste ken waya ti kuryente iti lugar gapu ta saan a makadalyasat iti kalsada dagiti empleado ti Ilocos Norte Electric Cooperative (INEC).
Innayon na nga iti agdama ket ti generator iti municipyo ti us-usaren dagiti umili nga agcharge kadagiti cellphone da ken adda metten sumagmamano a kalugaran da nga addaan ti bukod a generator nga isu ti us-usaren da kabayatan a saan pay a naisubli ti suplay ti kuryente da.
Basar pay ken ni Andres, agkurkurang payen ti taraon da gapu ta nairana a dimmuprak ti bagyo Neneng iti panagani da.
Nupay kasta, nagyaman ni Andres ken ni Congressman Sandro Marcos iti inpatulod na a 250 a food packs a maibunong kadagiti kalugaran da nga awan pulosen ti abasto na.
