LAOAG CITY – Kinumpirmaran dagiti kompania ti langis dagiti immunan a naipadamag nga agingga inton Abril laengen ti kapaut ti suplayda gapu iti gubat idiay Middle East.
Iti maikadua a panagdengngeg ti Proactive Response and Oversight for Timely and Effective Crisis Strategy (PROTECT) ti Senado, inadmitir ni Tanya Samillano, Presidente ti Independent Philippine Petroleum Companies Association (IPPCA) nga agingga inton Abril laengen ti fuel deliveries para kadagiti miembroda.
Sumagmamano kadagiti miembro ti Independent Philippine Petroleum Companies Association ket ti Eastern Petroleum, FilOil, SeaOil, UniOil, Flying V ken LiquiGaz.
Inbatad ni Samillano nga awan pay ti naawatda a kumpirmasion mainaig kadagiti sumaruno a deliveries kalpasan ti Abril.
Kuna ni Chevron Philippines Inc. President ken Country Chairman Pongtorn Tangmanuswong a ti imbentarioda ket agingga inton maudi a lawas laengen ti Abril.
Inpetteng ni Shell Pilipinas Corp. President ken CEO Lorelie Quiambao-Osial, no agtalinaed ti riribok idiay Middle East, maddaan ti limitado a suplay ti produkto a petrolyo iti intero a lubong.
Inrakurak ni Jetti Petroleum, Inc. Corporate Affairs Manager Johann Marc Aseoche a marigrigatanda a pagtalinaeden ti suplayda nga agingga 20 nga aldaw laengen ti kapautna.
Nupay kasta, adda ti sumangpet nga order-da nga inangkatda idiay Malaysia, China ken South Korea.
Kabayatanna, inpakaammo ti Petron nga agpaut laengen ti suplay ti petrolyoda agingga inton Mayo.
