LAOAG CITY – Inlawlawag ni Dra. Czarina Alcaraz, head ti OB-Gyne Department iti Mariano Marcos Memorial Hospital and Medical Center iti ciudad ti Batac dagiti possible a sintomas ti postpartum depression.
Karaman ditoy ti panagbalin a naliday, anxiety ti maysa nga ina no sadinno a saannan a kabaelan nga aramiden dagiti trabaho na iti uneg ti balay, pakairamanan ti obligasyon na iti kaipasngay laeng nga anak na.
Segun ken ni Dra. Alcaraz, no addan ti nasurok a makalawas nga agpaspasar kadagitoy a sintomas ti maysa nga ina sipus nagpasngay ket masapol a mapan agpakonsultar iti doktor gapu ta senyales daytoyen ti postpartum depression.
Kuna na a masapol a maagasan ken matulungan a makarekobre ti maseknan nga ina gapu ta dakkel ti responsibilidad na iti panangaywan na iti kaipasngay nga anakna.
Innayon na a ti kapatgan tapno masigurado nga alisto a makarekobre ti ina nga agpaspasar ti postpartum depression ket ti suporta ti sibubukel a pamilya na.
