LAOAG CITY – Masdaaw ni Mr. Constante Ragotero Pres. ti Meat Vendors Association ti ili a San Nicolas no apay nga awan ti supply ti danum iti Meat Section ti Tiendaan ti nasao nga ili idinto a kadagiti sabsabali a section kas iti paglakwan ti ikan ken iti Carinderia ket adda.
Kuna ni Ragotero a daytoy ti rason no apay a nagaplikar da iti supply ti danum manipud iti San Nicolas Water District ngem agpapan ita sipud nagaplikar da agarup maysan a bulan ti napalabas ket awan pay.
Inlawlawag na a ti ar-aramiden da ita ket bagkaten da ti kasapulan da a danum tapno adda usaren da.
Innayon ni Ragotero a saan na nga ammo no agkurang ti obbog ti danum manipud iti bobon ti tiendaan a pakaal-alaan ti supply a danum gapu ta adda met supply ti danum kadagiti sabsabali a section.
Immapela kadagiti maseknan a tulungan da dagitoy nangnangruna ket karne dagiti lako da.
Awan met pay sungbat ti munisipyo mainaig iti nasao a problema.
