LAOAG CITY – Inakusaran ni Mr. John Paul Pastor, ti Chief Tanod iti Barangay 50, Buttong ditoy ciudad ti Laoag ni Mr. Bryan Tamayo nga agipangpangta bayat panangsita na iti daytoy.
Segun kenni Pastor, bayat nga agbanbantay iti barangay da ket nakita na ni Tamayo a maipagarop nga adda ti inyawat na a plastic iti maysa a babai.
Ni Tamayo ket supporter ni Barangay Kagawad Maureen Bonoan a kandidato iti kina-kapitan.
Inbatad na a gapo iti daytoy ket immasideg iti ayan ti babai ken dinamag na no anya ti inyawat ni Tamayo kenkuana ken ditoy metten a maipagarop a pinangtaan ni Tamayo isuna ken inbalikas na ti “Bassit lang ti Brgy. Buttong, malpas laeng ti eleksyon”.
Malaksid iti daytoy, inrakurak pay ni Pastor nga iti napalabas nga aldaw ket maipagarop nga inpakamat ni Tamayo isuna ken dagiti dadduma pay a tanod babaen kadagiti miembro ti Confederation of Ilocano Association Incorporation SAMAHANG ILOCANO CIASI.
Mainaig iti daytoy, inpetteng ni Pastor a saan da nga agsadsada kadagiti tattao iti barangay da gapo ta ti pudno a mangar-aramid iti daytoy ket ti grupo ni Tamayo ken ti supsuportaran da a partido. Kabayatanna, inpalgak ni Pastor nga ar-aramiden da laeng ti obligasyon da kas Barangay Tanod a mangsigurado a natalna ti barangay da.
