LAOAG CITY – Nagdesisyon ti Supreme Court (SC) En Banc a naan-anay nga ibasura ti mosyon ti Kamara de representantes a mangkidkiddaw a baliktaden ti desisyon idi Hulyo 25, 2025 a mangibagbaga a mailabsing iti Konstitusyon ti impeachment kontra ken ni Vice President Sara Z. Duterte.
Pinatibker ti Korte Suprema a ti maikapat nga impeachment complaint a naipatulod iti Senado idi Pebrero 5, 2025 ket maipawil iti babaen ti Article XI, Section 3(5) ti Konstitusyon.
Saan a nakipaset ni Associate Justice Alfredo Benjamin Caguioa, idinto a naka-leave ni Associate Justice Maria Filomena Singh.
Inlawlawag ti kangatoan a korte iti pagilian a ti immuna a reklamo ket saan a nairaman iti Order of Business iti uneg ti naikeddeng a 10 a session days.
Inpetteng pay ti Korte Suprema ti panagduduma ti dua a wagas ti impeachment no sadinno a ti umuna ket dimmalan iti proseso ti Committee on Justice, idinto a ti maikadwa ket dagus a maipatungpal no adda ti pirma ti 1/3 kadagiti miembro ti kamara de representantes.
Pinatibker ti Korte Suprema ti maipatpatungpal a due process iti impeachment, ngem daytoy ket addaan ti naidumduma a klase ken naan-anay a panangusig ket iti senado ti pakaipatpatungpalan na.
Dagus a maipatungpal ti resolusyon kalpasan ti digital service iti amin a partido.
