LAOAG CITY – Manamnama a mapilaan ti kaso a theft ti maysa a lalaki a nagtakaw ti cable wire ti maysa a Telecommunication Company iti Barangay Madiladig ditoy ciudad ti Laoag.
Nabigbig ti suspek a ni Christian Jay Agtang Salmasan, agtawen ti 23, baro, mannalon ken residente iti Barangay Camanga iti ili ti Badoc.
Basar iti imbestigasyon, nagreklamo dagiti mangibagi iti UP East Security Agency kalpasan a naduktalan a mapukpukaw dagiti waya iti nasao a cell site tower.
Inpakaammo met ni Mr. Pacifico Gorospe, residente iti lugar, nga adda ti nakita na a lalaki a nakalugan ti motorsiklo a nakaparking iti asideg ti cell site tower.
Dagus da met a nabigbig ti suspek ken naala manipod kenkuana dagiti waywaya ti cell site tower.
Iti agdama, nagtalinaed ti suspek iti Philippine National Police ditoy ciudad ti Laoag.
