LAOAG CITY – Kinumpirmaran ni Police Lieutenant Colonel Andrew Rabang, ti Hepe iti Philippine National Police ditoy siudad ti Laoag a miembro ti Salisi Gang ken Commando Group ti natiliw a lalaki iti bypass road ditoy siudad ti Laoag.
Segun kenkuana, naarestar ti suspek babaen kadagiti otoridad kalpasan a naalaan daytoy ti maysa a calibre 45 pistol ken maysa a magazine nga addaan ti innem a balana.
Inbatadna a gapu ta awan ti maipakita ti suspek nga aniaman a dokumento a mangipaneknek a legal daytoy nga agikot ti paltog ket ditoy a natiliw isuna.
Inlawlawagna a kabayatan ti panagkapkap dagiti napan nagresponde a pulis iti suspek ket ditoy a naala pay ti dua nga small transparent plastic sachet a naglaon ti maatap a shabu, maysa a disposable lighter ken sumagmamano a kuarta.
Mainaig iti daytoy, inpakaammo ni Police Lieutenant Colonel Rabang a nangiwayatda ti panangberipikar iti kinatao ti suspek iti Philippine National Police – System iti Crime Incident Reporting Analysis System ket ditoy a naduktalanda a miembro ti suspek iti Salisi Gang ken Commando Group.
Malaksid iti daytoy, inbutaktakna a karaman pay ti suspek iti sumagmamano a krimen kas ti robbery, theft ken panaglabsing iti Republic Act No. 9165 wenno ti Comprehensive Dangerous Drugs Act of 2002 kadagiti nagduduma a rehion.
Innayonna a saan laeng a ditoy Ilocos Norte ti operasion ti suspek no di ket karaman pay iti Nueva Ecija, Tondo, Manila ken Camarines Sur.
Naammoan a saan a taga-Ilocos Norte ti suspek no di ket taga idiay Tondo, Manila.
Iti agdama, ti suspek ket sumangsango iti panaglabsing iti Republic Act No. 10591 ken Republic Act No. 9165.
Kabayatanna, rumrummuar a maipagarup nga adda ti target ti suspek a papatayen ditoy probinsia banag nga im-imbestigaren ita iti pannakabagi ti linteg.
