LAOAG CITY – Inbatad ni Police Major Vencioly Luzano, ti chief of police ti PNP-Pasuquin nga agtultuloy ti naun-uneg nga imbestigasyon da iti maatap nga hit-and-run incident iti Barangay Nagsanga iti nasao nga ili a nakatayan ti biktima.
Binigbig ni Luzano ti biktima a ni Arlan Jomar Aporda, agtawen ti 30, trabahador iti maysa nga hotel iti ili ti Pasuquin ken residente iti Poblacion 1, Pasuquin.
Segun kenni Luzano, iti pasado alas-diyes idi rabii ket nag-out manipud iti pagtrabahoan na ti biktima ken establisaren da no adda ken sadinno ti nagturongan na.
Kunana a rumrumuar a desgrasya ti napasamak ngem saan da nga ikkaten ti posibilidad nga adda ti foul play iti daytoy wenno ado nga anggulo ti ad-adalen da.
Iti met inisyal nga imbestigasyon dagiti otoridad, kuna ni Luzano a rumrumuar a bimmaba ti biktima manipud iti lugan na a pick-up ken maipagarop a ditoy nga adda ti nangdungpar.
Inlawlawag na pay a ti bado ti biktima ket adda ti pigis na no sadinno a mabalin a naisab-it wenno posible a naguyod gapo ta adayo ti ayan ti lugan na iti nakakitaan da iti mismo bagi ti biktima.
Naamoan a gapo iti napasamak ket nagsagaba ti nakaro a sugat iti ulo ti biktima ken rimuar ti sumagmamano a lalaem na.
Iti agdama, manarimaan ti imbestigasyon ti PNP no sadinno ket ireview da dagiti CCTV iti lugar ken ti mismo cellphone ti biktima a makatulong iti imbestigasyon.
