LAOAG CITY – Natiliw ti suspek ti hit and run incident a napasamak iti Brgy. Puyupuyan iti ili ti Pasuquin.
Nabigbig daytoy a ni Rolando Menor Menor, agtawen ti 65, naasawaan ken residente iti Brgy. Centro Dos, Sanchez Mira, Cagayan idinto a dagiti biktima ket isuda Neil John Aguinaldo Madamba, agtawen ti 24, awanan ti asawa ken ti kinalubbon na a ni Dominic Aguinaldo Madamba, agtawen ti 22, estudyante ket agpada a residente iti Brgy. Ngabangab iti nasao nga ili.
Iti imbestigasyon dagiti otoridad, agpaabagatan ti suspek a nakalugan ti gray Nissan Terra nga addaan ti plate number IAD 3166 idi nadungpar na dagiti biktima a nakalugan ti motorsiklo.
Gapo iti daytoy, naitaray dagiti biktima iti Rural Health Unit iti ili ti Pasuquin para iti pannakataming da ken dagus da met laeng a nakarwar.
Kalpasan daytoy, natiliw ti suspek iti Barangay Poblacion 4 iti nadakamat met laeng nga ili ken nakumpiskar pay kenkuana ti maysa a kalibre 45 a paltog nga addaan ti dua a magazine ken 38 a bala ken awan ti naipakita na a dokumento ti armas na.
Iti agdama, adda iti kustudiyar ti Philippine National Police iti ili ti Pasuquin ti suspek ken maisagsagana dagiti dokumento para iti pannakaipila ti reklamo a Reckless Imprudence Resulting to Multiple Physical Injuries and Damage to Property ken ti panaglabsing iti Article 275 iti Revised Penal Code ken panagsalungasing iti Republic Act 10591 wenno Comprehensive Firearms and Ammunition Regulation Act.
